តើភាពស្មោះត្រង់មានន័យដូចម្តេច? នេះគឺជាពាក្យដែលមនុស្សគ្រប់រូបធ្លាប់បានឮ និងចែករំលែកនៅក្នុងជីវិតរស់នៅប្រចាំថ្ងៃរបស់ពួកគេ បើទោះបីជាប្រើប្រាស់វាញឹកញាប់ ឬមិនញឹកញាប់ក្តី ពាក្យនេះនូវតែមានអត្ថន័យយ៉ាងជ្រៀលជ្រៅបំផុត។
ន័យចម្បងរបស់វាគឹជាការផ្តោតសំដៅ ប្តេជ្ញាចិត្ត ស្មោះស្មគ្រ ស្មោះស។ នៅពេលមនុស្សម្នាក់ក្លាយជាមនុស្សស្មោះត្រង់បានន័យថាគាត់គឺជាម្នាក់ដែលអាចទុកចិត្តបាន និងអាចជឿបាន។
មានរឿងរ៉ាវជាច្រើនដែលយើងជួបប្រទះនៅក្នុងជីវិតស្ថិតនៅក្នុងកាលៈទេសៈណាមួយជាមួយពាក្យស្មោះត្រង់នេះ ដូចជាស្មោះត្រង់ជាមួយស្វាមីភរិយា មិត្តភក្តិ អាជីព សកម្មភាព ឬអាចជាកីឡាដែលយើងចូលចិត្តជាដើម។
ប៉ុន្តែបើយើងក្រឡេកមកមើលនៅក្នុងអត្ថបទព្រះគម្ពីរវិញ តើមានអ្វីខ្លះដែលព្រះសព្វព្រហទ័យចង់ឲ្យអ្នកធ្វើជាមួយនឹងពាក្យស្មោះត្រង់នេះ។ តើព្រះចង់ឲ្យអ្នកមានការប្តេជ្ញាចិត្តបែបណាខ្លះ?
១ កូរិនថូល ១០:១២-១៣
ដូច្នេះ បើអ្នកណានឹកស្មានថា ខ្លួនមានជំហរមាំមួន អ្នកនោះត្រូវប្រយ័ត្នក្រែងលោជំពប់ដួលទៅវិញ។ គ្មានការល្បួងណាមួយកើតមានដល់បងប្អូន ក្រៅពីការល្បួងដែលមនុស្សលោកតែងជួបប្រទះនោះឡើយ។ ព្រះជាម្ចាស់មានព្រះហឫទ័យស្មោះត្រង់ ទ្រង់មិនបណ្ដោយអោយមារល្បួងបងប្អូនហួសពីកម្លាំងបងប្អូនទេ ប៉ុន្តែ នៅពេលបងប្អូនជួបការល្បួង ព្រះអង្គនឹងប្រទានមធ្យោបាយអោយបងប្អូនចេញរួច និងអោយបងប្អូនអាចទ្រាំទ្របាន។ KHSV
លូកា ១៦:១០-១២
អ្នកណាស្មោះត្រង់ក្នុងកិច្ចការដ៏តូច អ្នកនោះក៏ស្មោះត្រង់ក្នុងកិច្ចការធំដុំដែរ។ អ្នកណាបោកបញ្ឆោតក្នុងកិច្ចការដ៏តូច អ្នកនោះក៏តែងបោកបញ្ឆោតក្នុងកិច្ចការធំដុំដែរ។ ប្រសិនបើអ្នករាល់គ្នាមិនស្មោះត្រង់ក្នុងរបៀបប្រើប្រាស់ទ្រព្យសម្បត្តិលោកីយ៍ដែលបញ្ឆោតចិត្តនេះទេ ព្រះជាម្ចាស់ក៏ពុំអាចប្រគល់ទ្រព្យសម្បត្តិដ៏ពិតប្រាកដមកអ្នករាល់គ្នាបានដែរ។ ប្រសិនបើអ្នករាល់គ្នាមិនស្មោះត្រង់នឹងទ្រព្យសម្បត្តិអ្នកដទៃផង ធ្វើម្ដេចអោយព្រះជាម្ចាស់ប្រទានទ្រព្យសម្បត្តិដែលព្រះអង្គបម្រុងទុកសំរាប់អ្នករាល់គ្នា មកអ្នករាល់គ្នាបាន! KHSV
ម៉ាថាយ ២៤: ៤៥-៤៦
បើអ្នកបំរើណាមានចិត្តស្មោះត្រង់ ហើយឈ្លាសវៃ ម្ចាស់មុខជាផ្ទុកផ្ដាក់អោយអ្នកបំរើនោះមើលខុសត្រូវលើអ្នកបំរើឯទៀតៗ ក្នុងការចែកម្ហូបអាហារអោយគេ តាមពេលកំណត់ពុំខាន។ ពេលម្ចាស់ត្រឡប់មកដល់ផ្ទះវិញ ឃើញអ្នកបំរើកំពុងបំពេញកិច្ចការរបស់ខ្លួនដូច្នេះ អ្នកបំរើនោះប្រាកដជាមានសុភមង្គលហើយ។ KHSV
ទុតិយកថា ៥:៣២-៣៣
អ្នករាល់គ្នាត្រូវគោរព និងប្រតិបត្តិតាមព្រះបន្ទូលដែលព្រះអម្ចាស់ ជាព្រះរបស់អ្នករាល់គ្នា បានបង្គាប់ដល់អ្នករាល់គ្នា ដោយឥតងាកទៅឆ្វេង ឬទៅស្ដាំ។ ត្រូវដើរតាមមាគ៌ាដែលព្រះអម្ចាស់ ជាព្រះរបស់អ្នករាល់គ្នា បានបង្គាប់មក ឥតល្អៀងត្រង់ណាឡើយ ដើម្បីអោយអ្នករាល់គ្នាមានជីវិត មានសុភមង្គល និងមានអាយុយឺនយូរ នៅក្នុងស្រុកដែលអ្នករាល់គ្នានឹងចូលទៅកាន់កាប់។ KHSV
សុភាសិត ៣:៥-៦
កុំពឹងលើការចេះដឹងរបស់ខ្លួនឡើយ តែត្រូវទុកចិត្តលើព្រះអម្ចាស់ទាំងស្រុង។ ចូរនឹកដល់ព្រះអម្ចាស់ក្នុងគ្រប់កិច្ចការដែលកូនធ្វើ នោះព្រះអង្គនឹងត្រួសត្រាយផ្លូវរបស់កូន។ KHSV
ម៉ាថាយ ២៥:២១
ល្អហើយ! អ្នកបំរើដ៏ប្រសើរ មានចិត្តស្មោះត្រង់អើយ! អ្នកបានស្មោះត្រង់នឹងកិច្ចការមួយដ៏តូចនេះ ខ្ញុំនឹងតាំងអ្នកអោយមើលខុសត្រូវលើកិច្ចការធំៗ។ ចូរអ្នកចូលមកសប្បាយរួមជាមួយនឹងខ្ញុំចុះ។ KHSV
កាឡាទី ៥:២២-២៣
រីឯផលដែលកើតមកពីព្រះវិញ្ញាណវិញ គឺសេចក្ដីស្រឡាញ់ អំណរ សេចក្ដីសុខសាន្ត ចិត្តអត់ធ្មត់ ចិត្តសប្បុរស ចិត្តសន្ដោស មេត្តា ជំនឿ ចិត្តស្លូតបូត ចេះទប់ចិត្តខ្លួនឯង។ គ្មានវិន័យណាជំទាស់នឹងសេចក្ដីទាំងនេះទេ។ KHSV
ហេប្រឺ ៣:២
ព្រះយេស៊ូមានព្រះហឫទ័យស្មោះត្រង់ចំពោះព្រះជាម្ចាស់ ដែលបានតែងតាំងព្រះអង្គ ដូចលោកម៉ូសេមានចិត្តស្មោះត្រង់ចំពោះកិច្ចការក្នុងព្រះដំណាក់ដែរ។ KHSV
២ ធីម៉ូថេ ២:១១-១៣
ពាក្យនេះគួរអោយជឿ គឺថាៈប្រសិនបើយើងរួមស្លាប់ជាមួយព្រះអង្គយើងក៏នឹងមានជីវិតរស់រួមជាមួយព្រះអង្គដែរ។ ប្រសិនបើយើងស៊ូទ្រាំយើងនឹងបានគ្រងរាជ្យជាមួយព្រះអង្គ។ប្រសិនបើយើងបដិសេធមិនទទួលស្គាល់ព្រះអង្គព្រះអង្គក៏នឹងបដិសេធមិនទទួលស្គាល់យើងវិញដែរ។ ប្រសិនបើយើងមិនស្មោះត្រង់ព្រះអង្គនៅតែស្មោះត្រង់ដដែលដ្បិតព្រះអង្គពុំអាចបដិសេធព្រះអង្គផ្ទាល់បានឡើយ។ KHSV
១ កូរិនថូស ១:៩
ព្រះជាម្ចាស់មានព្រះហឫទ័យស្មោះត្រង់ ព្រះអង្គបានត្រាស់ហៅបងប្អូនអោយរួមរស់ជាមួយព្រះបុត្រារបស់ព្រះអង្គ គឺព្រះយេស៊ូគ្រិស្ដជាព្រះអម្ចាស់នៃយើង។ KHSV